स्वास्थ्य क्षेत्रमा अनुकरणीय प्रयास ः अध्यक्ष कुँवर

भुम्लुटार । अहिलेसम्म स्वास्थ्य क्षेत्रमा पहुँच नपुगेका स्थानीय तहमा नेपाल सरकारको आधारभूत अस्पताल स्थापना गर्ने नीति अनुरुप सोमबार एकैपटक ३ सय ९६ वटा आधारभूत अस्पतालहरु शिलान्यास भएका छन् ।
नेपाल सरकारको ५८ अर्ब बजेट अनुमान गरिए अनुसार एउटै डिजाइनमा ति अस्पतालहरु स्वीकृत भई २ वर्षभित्र सञ्चालनमा ल्याउने लक्ष्यसहित शिलान्यास भएका छन् । क्रमशः ५, १० र १५ शैयाका ति अस्पतालहरुले स्वास्थ्यको क्षेत्रमा अनुकरणीय फड्को पार गर्ने भुम्लु गाउँपालिकाका अध्यक्ष गुमानध्वज कुँवरले बताउनुभएको छ ।
सोमबार भुम्लु गाउँपालिकाको वडा नं. ८ भुम्लुटारमा भएको शिलान्यास कार्यक्रमका बारेमा जानकारी दिने क्रममा अध्यक्ष कुँवरले उक्त भनाइ राख्नुभएको हो । राज्यले जुन नीति लिएको छ, त्यसको कार्यान्वयन गर्नु स्थानीय तहको दायित्व पनि हो । उपचार नपाएर कुनाकन्दरामा मृत्युवरण गर्न बाध्य भएका नागरिकहरुका लागि सरकारको यो प्रयास महत्वपूर्ण छ । तसर्थ, यो अभियानलाई सफल पार्नु हामी स्थानीय सरकारको दायित्व र जिम्मेवारी पनि हो ।
भुम्लु गाउँपालिकावासीले अब उपचार नपाएर मर्नुपर्ने बाध्यता आउने छैन । आफ्नो कार्यकालमा उदाहरणीय कार्यमध्ये स्वास्थ्यको क्षेत्रमा जीवनभर स्मरणयोग्य काम गर्ने जमर्काे लिएको छु । त्यसका लागि गाउँपालिका परिवार एकमत भएर सघाउने विश्वास पनि रहेको अध्यक्ष कुँवरको तर्क थियो ।
स्थानीय विद्यालयले प्रदान गरेको ३ रोपनी जग्गामा सुविधा सम्पन्न भवन बन्ने गाउँपालिका स्वास्थ्य इकाई प्रमुख सुदर्शन भट्टराईले बताउनुभएको छ । जसबाट आफूले भोग्दै आएको समस्याबाट स्थानीय बासिन्दालाई राहत मिल्ने विश्वास रहेको भट्टराईको तर्क थियो । सरकारको आधारभूत अस्पताल निर्माण गर्ने नीति अनुरुप काभ्रे जिल्लामा ५ वटा आधारभूत अस्पतालका शिलान्यास भएका छन् । जस अनुरुप धुलिखेल नगरपालिकाले काभ्रे भञ्ज्याङ्गमा रहेको काभ्रे स्वास्थ्य चौकीको स्तरोन्नती गरी १५ शैयाको आधारभूत अस्पतालको सोमबार नै नगर प्रमुख अशोक ब्याञ्जूले शिलान्यास गर्नुभएको छ । त्यसैगरी खानीखोला गाउँपालिकाको तालढुंगा स्वास्थ्य चौकीको स्तरोन्नती गरी उक्त स्वास्थ्य चौकीलाई आधारभूत १० शैयाको अस्पतालको रुपमा निर्माण गर्ने लक्ष्य सहित शिलान्यास भएको छ भने महाभारत गाउँपालिकाको घर्तीछाप स्वास्थ्य चौकीको स्तरोन्नती गरी आधारभूत अस्पतालको रुपमा अगाडि लैजाने लक्ष्य सहित शिलान्यास भएको छ । त्यसैगरी रोशी गाउँपालिकाको खहरेपाँगु स्वास्थ्य चौकीको स्तरोन्नती गरी १० शैयाको रोशी अस्पतालको रुपमा शिलान्यास भएको छ ।
यसरी काभे्र जिल्लामा ५ वटा आधारभूत अस्पतालहरुले आफ्नो सेवाको शुभारम्भका लागि जग हालेका छन् । यसबाट काभ्रे जिल्लामा स्वास्थ्य सेवाको अभावले तड्पिएका जनहरुका लागि केही मात्रामा भएपनि मलमपट्टि लाग्ने भएको छ ।