म मैनवत्ती…

धड्कन शर्मा, काठमाणडौं
हाल– ईजरायल

कसैको मनमा औंशीले
आक्रान्त पारेको बेला
बलेर, पग्लेर भएपनि

आफूलाई रित्याउन मन लाग्छ
एक छिमल उज्यालो भएर
ओठहरूमा सजिन मन लाग्छ
कसैका लागि निष्ठापूर्वक
सिद्धिनुको अर्थ, सिद्धिनु मात्र होइन
आत्मसंतुष्ट हुनुपनि हो

आफ्नो लागि मरिमेट्ने त
हजार छन्, दुनियाँमा हुन्छन् होला
पराइको लागि खर्चिने मन त
रात चम्काउने जूनपछी
केवल मैनबत्ति मात्रै होला

यद्यपि
यो अभिव्यक्ति
अहमताको सूचक होइन
मैनबत्ति हुनूको अर्थ
जिवन्त हुनु हो
अमर हुनु हो

यसर्थ म
मैनबत्ति नै हुन चाहन्छु
दुनियाँ चाहे बतास बनोस्
जमाना चाहे आँधी बनोस्
टिकिरहन मन छ चट्टान बनेर
जीवनको बाटोमा
संघर्षको प्रतीक भनेर
उज्यालोको विम्ब भएर
म कोमल, सुकोमल मनको
मैनबत्ति भएर

पग्लिएरै जिउन चाहान्छु
म मैनबत्ति, म मैनबत्ति जस्तै !