प्रेस सेन्टर नेपालको आयोजनामा नेकपा (माओवादी केन्द्र)का संयोजक पुष्पकमल दाहाल ‘प्रचण्ड’को सम्पादकसँग संवाद कार्यक्रम सम्पन्न

काठमाडौं / प्रेस सेन्टर नेपालको आयोजनामा आज राजधानी काठमाडौंमा नेपाल कम्युनिष्ट पार्टी (माओवादी केन्द्र)का संयोजक पुष्पकमल दाहाल ‘प्रचण्ड’ सँग देशभरका प्रमुख मिडियाका सम्पादकसँग संवाद कार्यक्रम सम्पन्न भएको छ । कार्यक्रममा संयोजक प्रचण्डले हालको राजनीतिक अवस्था, जेनजी आन्दोलनपछि उत्पन्न परिस्थिति, संविधान र लोकतन्त्रको संरक्षण, आगामी प्रतिनिधिसभा निर्वाचन, राष्ट्रिय सहमति र सहकार्यको आवश्यकता लगायत विषयमा विस्तृत धारणा राख्नुभयो । अध्यक्ष प्रचण्डले भन्नुभयो, ‘नेपाल अहिले संवेदनशील राजनीतिक मोडमा छ । जेनजी आन्दोलनले युवापुस्ताको असन्तोषलाई स्पष्ट देखाएको छ । तर त्यसलाई अवसरका रूपमा लिन सके, देशको राजनीतिक प्रणाली अझ सशक्त र उत्तरदायी बन्न सक्छ ।’ उहाँका अनुसार राजनीतिक दलले अब युवा पुस्ताको असन्तोषलाई शत्रु होइन, सुधारको सन्देशका रूपमा ग्रहण गर्नुपर्छ ।

जेनजी आन्दोलन र लोकतन्त्रप्रतिको जिम्मेवारी

अध्यक्ष प्रचण्डले हालैको जेनजी आन्दोलनलाई नेपालमा लोकतान्त्रिक अभ्यासको महत्वपूर्ण संकेतका रूपमा व्याख्या गर्दै आन्दोलनका कारणमा सरकार, राजनीतिक दल र राज्य संयन्त्र सबैले आत्ममूल्याङ्कन गर्नुपर्ने बताउनुभयो । उहाँले भन्नुभयो, ‘राज्यको अस्तित्व जनताको विश्वासमा टेकेको हुन्छ । त्यो विश्वास कमजोर हुन थाले लोकतन्त्र कमजोर हुन्छ । त्यसैले असन्तुष्टि र आवाजलाई दमन होइन, संवाद र सहमतिले सम्बोधन गर्नुपर्छ ।’ उहाँले आन्दोलनका क्रममा भएका केही घटना दुःखद र अस्वीकार्य भएको उल्लेख गर्दै, शान्तिपूर्ण विरोध जनाउने नागरिकमाथि बल प्रयोग गर्नु गलत भएको स्पष्ट पार्नुभयो । ‘राज्यले सहिष्णुता र जिम्मेवारी देखाउनैपर्छ । लोकतन्त्रलाई बलियो बनाउन विरोध र असन्तोषलाई सुन्न सक्ने संस्कृति विकास गर्नुपर्छ,’ उहाँको भनाइ थियो ।

संविधानको रक्षा र राजनीतिक स्थिरता

संविधान नेपालको राष्ट्रिय गौरव भएको बताउँदै अध्यक्ष प्रचण्डले यसलाई संशोधनमार्फत अझ सशक्त र समावेशी बनाउने आवश्यकता औंल्याउनुभयो । उहाँले भन्नुभयो, ‘संविधानलाई स्थिरता र समृद्धिको जग बनाउनुपर्छ । यसका कमजोरीलाई राजनीतिक सहमतिबाट सुधार्ने बाटो रोज्नुपर्छ, अस्थिरता निम्त्याउने बाटो होइन ।’ उहाँका अनुसार देशमा स्थिरता र विकासका लागि राजनीतिक दलबीच सहकार्य अनिवार्य छ । दलबीचको प्रतिस्पर्धा लोकतान्त्रिक स्वस्थता हो तर राष्ट्रका प्रमुख हितका मुद्दामा साझा दृष्टिकोण आवश्यक छ । ‘हामी सबैले देशलाई असफल देखाउन खोज्नेलाई असफल पार्नुपर्छ,’ उहाँले जोड दिनुभयो ।

आगामी निर्वाचन र जनताको अपेक्षा

अध्यक्ष प्रचण्डले आगामी फागुन २१ गतेका लागि तोकिएको प्रतिनिधिसभा निर्वाचनलाई ऐतिहासिक अवसरका रूपमा लिँदै त्यसलाई जनताको विश्वास पुनःस्थापना गर्ने मौकाका रूपमा लिनुपर्ने बताउनुभयो । उहाँले निष्पक्ष, स्वच्छ र भयमुक्त वातावरणमा निर्वाचन सम्पन्न गर्नका लागि सबै पक्ष एकजुट हुनुपर्ने बताउनुभयो । उहाँले माओवादी केन्द्रले सामाजिक न्याय, समावेशीता, समान अवसर र युवाको भविष्य सुनिश्चित गर्न प्रतिबद्ध रहेको उल्लेख गर्नुभयो । ‘हामी जनताको आवाज सुन्न तयार छौं । जनताको शासन बलियो बनाउन र युवापुस्तालाई भविष्यप्रति आशावादी बनाउन हाम्रो पार्टी दृढ छ,’ उहाँले स्पष्ट पार्नुभयो ।

राष्ट्रिय सहकार्य र सञ्चार माध्यमको भूमिका

अध्यक्ष प्रचण्डले सम्पादकलाई सम्बोधन गर्दै सञ्चार माध्यमको निष्पक्षता, संयमता र राष्ट्रप्रतिको उत्तरदायित्वबारे विशेष जोड दिनुभयो । उहाँले भन्नुभयो, ‘सञ्चार माध्यमले जनताको चेतना निर्माण गर्छ । त्यसैले मिडिया विभाजन होइन, एकताको सन्देश प्रवाह गर्ने माध्यम हुनुपर्छ ।’ उहाँले सत्य, तथ्य र जिम्मेवार पत्रकारिताको अभ्यासले मात्र लोकतन्त्रलाई सबल बनाउने उल्लेख गर्नुभयो । सञ्चार माध्यम र राजनीतिक शक्तिबीच सहकार्यको वातावरण सिर्जना गर्न सक्नुपर्छ भन्नेमा उहाँको जोड थियो ।

युवा पुस्ताप्रतिको विश्वास र सामाजिक न्याय

उहाँले नयाँ पुस्तालाई देश निर्माणको अग्रपंक्तिमा ल्याउन राज्यले स्पष्ट नीति ल्याउनुपर्ने बताउनुभयो । शिक्षित र सीपयुक्त युवाको क्षमता देशभित्र उपयोग गर्न सक्ने वातावरण सिर्जना गर्नु आजको आवश्यकता रहेको उहाँको भनाइ थियो । ‘युवालाई सुन्नु भनेको भविष्यलाई सुन्नु हो,’ अध्यक्ष प्रचण्डले भन्नुभयो, ‘यदि हामीले युवाको सपना सुन्न सकेनौं भने हामी भविष्यप्रति उत्तरदायी रहँदैनौं ।’

कार्यक्रममा प्रेस सेन्टर नेपालका अध्यक्ष कमल गिरी, अन्य पदाधिकारी, विभिन्न सञ्चार संस्थाका सम्पादक, युवा पत्रकार र मिडिया प्रतिनिधिको उल्लेखनीय उपस्थिति थियो । कार्यक्रमको सञ्चालन प्रेस सेन्टर नेपालका अध्यक्ष गिरीले गर्नुभएको थियो । सम्पादकका प्रश्नमा अध्यक्ष प्रचण्डले विस्तृत जवाफ दिँदै देशलाई संकटबाट निकास दिने उपाय राजनीतिक संवाद र साझा दृष्टिकोणमै रहेको पुनः दोहोर्याउनुभयो । अन्त्यमा उहाँले लोकतन्त्र, राष्ट्रिय एकता र संविधानको रक्षा सबै राजनीतिक शक्तिको साझा जिम्मेवारी रहेको उल्लेख गर्दै देशलाई समृद्धिको बाटोमा अघि बढाउन सबैले एकजुट हुनुपर्ने सन्देश दिनुभयो ।