मानसरोवर–कैलास यात्राको चाप बढ्यो, ६ महिनामै रसुवागढी नाकाबाट १७ हजारभन्दा बढी यात्रु चीनतर्फ

काठमाडौँ, मानसरोवर–कैलास दर्शनका लागि जाने तीर्थयात्रीहरूको संख्या बढेसँगै नेपाल–चीन सीमा रसुवागढी नाकामा यात्रुको उल्लेखनीय चाप देखिएको छ।

अध्यागमन कार्यालय रसुवागढीका प्रमुख यादव भण्डारीका अनुसार सन् २०२६ को जनवरीदेखि जुन १४ सम्म रसुवागढी नाकाबाट १७ हजार २४१ जना यात्रु चीनतर्फ प्रस्थान गरेका छन्। ती यात्रुहरू नेपाल, भारत, अमेरिका, रूस, अष्ट्रेलिया, भुटान, बेलायत, मलेसिया र जर्मनीलगायत देशका नागरिक रहेका छन्।

कार्यालयका अनुसार अधिकांश यात्रु मानसरोवर–कैलास तीर्थयात्राका लागि चीन प्रवेश गरेका हुन्। छोटो, सहज र सुविधाजनक मार्ग भएकाले रसुवागढी नाकाप्रति यात्रुहरूको आकर्षण बढ्दै गएको बताइएको छ।

काठमाडौँबाट बसमार्फत करिब १० घण्टामा रसुवागढी पुग्न सकिने तथा हेलिकोप्टरमार्फत करिब आधा घण्टामै पुग्न सकिने भएकाले पनि यात्रुहरूले यो मार्ग रोज्न थालेका छन्। टिमुरे हेलिप्याडका व्यवस्थापक सोनाम वाङ्दी तामाङका अनुसार केही यात्रुले काठमाडौँदेखि घट्टेखोलासम्म हेलिकोप्टर सेवा प्रयोग गर्ने गरेका छन्।

यात्रुको चाप बढेसँगै अध्यागमन कार्यालयमा सेवा प्रवाहमा चुनौती थपिएको छ। कर्मचारी अभावका कारण भिसा दर्ता तथा अनुमति प्रक्रियामा यात्रुले लामो समय लाइनमा बस्नुपर्ने अवस्था रहेको छ। हाल दुईवटा डेस्कबाट मात्र सेवा प्रदान भइरहेको कार्यालयले जनाएको छ।

यस अवधिमा भिसा दर्ता तथा अन्य सेवा शुल्कबाट ६२ लाख ८० हजार ४२० रुपैयाँभन्दा बढी राजस्व संकलन भएको छ। यात्रुहरूको बढ्दो आवागमनले स्याफ्रुबेँसी, टिमुरे र घट्टेखोला क्षेत्रका होटल, यातायात तथा अन्य व्यवसायहरू पनि चलायमान बनेका छन्।