मन्त्रीद्वय एउटै मञ्चमा स्वागत र सम्मान

काभ्रे । नेकपा माओवादी केन्द्र पनौती नगर समितिले कृषि तथा पशुपन्छी र युवा तथा खेलकुद मन्त्रीद्वयलाई एक समारोहको बिच पनौतीमा स्वागत र सम्मान गरेको छ ।
बागमती प्रदेश सरकारद्वारा नियुक्ति लिनुभएका माननीय बसुन्धरा हुमागाईं र माननीय रत्न ढकाल एक हप्ता अगाडि मन्त्रीमा नियुक्ति हुनुभएको थियो । यो बिचमा उहाँहरुलाई आ–आफ्नो निर्वाचन क्षेत्रका मतदाताहरुले सम्मान गर्न तँछाडमछाड गरेर होडबाजी चलाइरहेको बेला पनौती नगर समितिले दुवै मन्त्रीलाई एउटै मञ्चमा राखेर सम्मान गरेर अनुकरणीय संस्कारको विकास गरेको स्थानीयको प्रतिक्रिया छ ।

आजभन्दा अगाडि यसरी दुई फरक विचारका मन्त्रीहरुलाई एउटै मञ्चमा राखेर सम्मान गरिएको अभिलेख दुर्लभ नै छ । जसको सुरुवात पनौती नगर समितिले गरेकोमा मन्त्रीद्वयद्वारा सम्बोधन गर्ने क्रममा पनौती नगर समितिलाई धन्यवाद दिन पछि पर्नु भएन । आ–आफ्नो जिम्मेवारीबाट जनताका लागि चर्चा गर्न लायकका कामहरु गरेर देखाउने प्रतिबद्धता सो अवसरमा मन्त्रीद्वयले व्यक्त गर्नुभएको थियो । अत्यन्तै व्यस्त समयका बाबजुद उपस्थित भएर आफ्ना कार्यकर्ताहरुको मनोबल वृद्धिका लागि समय खर्चिदिएकोमा नेकपा माओवादी केन्द्र पनौती नगर समितिका अध्यक्ष हस्तबहादुर तामाङद्वारा मन्त्रीद्वयप्रति आभार व्यक्त गर्नुभएको थियो ।

सोही अवसरमा नगर समितिले पनौती नगरको इन्चार्जकत्व गरेर पनौतीलाई अब्बल बनाउन महत्वपूर्ण भूमिका निर्वाह गरेको भन्दै प्रदेश सदस्य होमबहादुर खुलाललाई पनि सम्मान गरेको थियो । उक्त कार्यक्रममा मन्त्रीद्वय तथा सदस्य खुलाललाई सम्मान पत्र, खादा एवं पुष्पगुच्छाद्वारा सम्मान गरिएको थियो । कार्यक्रमको सञ्चालन नगर सचिव माधव हुमागाईंले गर्नुभएको थियो भने कार्यक्रमको अध्यक्षता नगर अध्यक्ष हस्तबहादुर तामाङले गर्नुभएको थियो ।